تطبيقات للسفر || Traveling Apps

بوست اليوم راح يكون عن تطبيقات الجوال اللي تحتاجها للسفر, التطبيقات كثيرة لذلك راح نبدأ فيها على طول!


1- PackPoint

تطبيق باك بوينت عبارة عن قائمة للأغراض اللي راح تحتاج أنك تأخذها معاك في سفرك, ينسقها لك التطبيق على حسب الحاجة من سفرتك, مُدتها, وإلى وين بتسافرإذا بتروح لغرض العمل أو سياحة و إذا بتروح لمدينة حارة أو بارد, ساحلية أو لا…إلخ, طبعا راح يعطيك القائمة كإقتراح منه تقدر تحذف اللي ماتبغاه لما تسحبه لليسار أو إذا تبغى تضيف شيء مو موجود للقائمة, وتقدر تحدد كمية الغرض بضغط + الموجود قدام كل غرض.

التطبيق لا يدعم العربية, فيه منه نسخة مجانية, النسخة المدفوعة (1.99$) ما أحسها مهمة إلا لو كنت صاحب أعمال وتسافر كثير ممكن تكون مفيدة أكثر من المجانية, بس كعامة ما أشوف فيه حاجة للمدفوعة. التطبيق لا يحتاج إلى إتصال بالإنترنت. موجود هنا رابط التحميل لمستخدمي IOS ومستخدمي Android.

فيه تطبيقات بديلة له كثير, لكن أشوف أن هذا أفضلهم لثلاث أسباب: تصميم واجهات التطبيق, طريقة عمله, سهولة إستخدامه إللي يعود للسبب الأول وهو التصميم الجيد!


 2- Expedia

تطبيق إكسبيديا تطبيق يساعدك تلقى رحلة, فندق, سيارة, والأشياء اللي ممكن تسويها بالمدينة مثل زيارة المتاحف وغيرها, التطبيق أشوفه مفيد جدًا خاصة في المقارنة بين الأسعار ويعطيك الأشياء اللي عليها خصم, تقدر تستخدمه بدون ما تسجل بيناتك يعني ممكن تطلع فقط, وبالكفة الثانية تقدر تسجل بيناتك وتدفع لرحلتك أو غرفتك أو أي شيء ثاني يوفره التطبيق, لو كنت حاجز رحلتك وخلاص تقدر تدخل رقم Itinerary للرحلة (رقم مسار الرحلة) وراح يعرض عليك خدمات في مدينة الوصول.

التطبيق لا يدعم العربية, في أول فندق تحجزه عن طريق التطبيق ويكون سعره 100$ أو أكثر راح يخصم لك 25$ من السعر. التطبيق كواجهات جميل جدًا لكن ما أشوف إستخدامه سهل, فيه تطبيقات بديلة كثير غيره لكن أشوف إن هذا هو الأفضل بينهم لأنه الوحيد اللي تقدر تطلّع وتحجز وتدفع للأماكن السياحية عن طريقة! التطبيق يحتاج لإتصال بالإنترنت طبعا لأنه يحتاج معلومات من مصارد كثيرة ويحدثها بشكل دوري.

 التطبيق مجاني موجود هنا رابط التحميل لمستخدمي IOS ومستخدمي Android.


3- Airbnb

التطبيق يسهل للناس تعرض فيه بيتها أو جزء منه خاصة لما يكون أصحابه يسافرون كثير أو عندهم مساحة كبيرة ببيتهم مايحتاجونها, التطبيق يفيدك أنت بأنه يوفر لك بيت بأثاثه  خاصة  لما تكونون عائلة كبيرة فتسكنون في بيت واحد بدل كم غرفة في فندق أو اللي معاهم أطفال كثير, لأن غالبية الفنادق بالخارج ماتستقبل أكثر من طفلين إلى ثلاثة, وأشوفها تجربه ممتعه تعيش في بيت وجيرانك من أهل المدينة! طبعا حاول تروح للبيوت اللي تلقى تحتها Reviews أو آراء لناس جربوا يسكنون في البيت اللي أخترته من باب الحيطة والحذر.

التطبيق سهل إستخدامه, لا يدعم العربية, مجاني ويحتاج للإتصال بالإنترنت للحصول على معلومات محدثة, موجود هنا رابط التحميل لمستخدمي IOS ومستخدمي Android.


4-Copilot

التطبيق ببساطة خريطة تعمل بدون الحاجة لإتصال بالإنترنت, في البداية ترددت أحطه لأن لي تجربة سيئة معاه وبعدها حذفته وما حاولت أستخدمته مره ثانية, بس قريب سمعت أنه تحدث وصلحوا المشاكل اللي فيه وحتى تغير شكل الأيقونه عن اللي موجودة هنا بس مالقيت لها صورة, بعد التحديث صار برنامج جيد ويفك أزمات لو ماعندك إتصال بالأنترنت! أعجبني أنك ممكن تخلي الشاشة بشكل الطريق الأقرب للواقع, وهذا يساعد خاصة للمنعطفات الصغيرة وأسهل للسائق نفسه يتتبعها.

screen322x572 (1)screen322x572

ما تعجبني واجه التطبيق أحس فيها أشياء كثير تشتت الإنتباه ومزعجة, إستخدامه مو صعب, والتطبيق مجاني موجود هنا رابط التحميل لمستخدمي IOS ومستخدمي Android.

له بديل المعروف Google map

أشوفه أفضل بكثير لكنه يحتاج لإتصال باللإنترنت, وموجود هنا رابط التحميل لقوقل ماب لمستخدمي  IOS ومستخدمي Android.


5- Uber

تطبيق أوبر يوفر لك سيارة تجي تنقلك يستخدم موقعك عن طريق GPS عشان يوصل لك, تقدر تحدد درجة فخامة السيارة اللي راح تنقلك وطبعا راح يزيد السعر, التطبيق عبارة عن خريطة فيها السيارات اللي حولك من نفس الدرجة اللي تختارها تححد الموقع اللي تبغى السيارة تجي لك فيه أو تختار نفس موقعك وراح يعطيك وقت تقريبي متى راح توصلك السيارة.

سهل إستخدام التطبيق بس إنتبه تكنسل الطلب بعد ما تأكده, لأنه راح يحسب عليك مبلغ حتى لو ماركبت, لذلك تأكد من الطلب وموقعك قبل تأكد الطلب, التطبيق مجاني, يحتاج بطاقة فيزا عشان تحاسب عن طريقها, لايدعم العربية,  يحتاج إتصال بالإنترنت. موجود هنا رابط التحميل لمستخدمي IOS ومستخدمي Android.

في بديل للتطبيق وهو الأشهر عندنا Easy Taxi

 موجود هنا رابط التحميل لمستخدمي IOS ومستخدمي Android.


6- Google translator

تطبيق للترجمة, طبعا المعروف عن مترجم قوقل أنه سيء في الترجمة لكن في التطبيق مميزات تشفع له عن غيره, أهمها تطبيق الترجمة عن طريق التصوير, وهذا يساعدك أولا أنه أسرع من كتابة الكلمات بعدين ترجمتها وثانيا يساعدك في ترجمة اللغات اللي بالأساس ماعندك كيبورد للغة نفسها أو ماتعرف تتهجأ حروفها عشان تكتبها مثل الكلمات باللغة الصينية.

التطبيق سهل, بالرغم من ترجمتة السيئة لكن كل ماترجمت كلمات أقل كل ما كان قابليتها لأن تكون صحيحة أكثر, فلا تحاول تترجم قطعة كاملة أكيد راح يكون فيها أخطاء! التطبيق يحتاج إلى إتصال بالإنترنت, مجاني وموجود هنا رابط التحميل لمستخدمي IOS ومستخدمي Android.


7- WIFI Map

تطبيق واي فاي ماب مو بس للناس اللي بتسافر أتوقع الكل يحتاجه! التطبيق يعلمك عن شبكات الإنترنت اللي حولك ولو مقفلة برقم سري يعطيك إياه, وتقدر تبحث عن مكان معين وتحفظ الباسورد حقهم قبل تطلع من بيتك مثلا وإذا رحت هناك تشبك على الواي فاي بدون ماتحتاج تستخدم 3/4G جوالك! تقدر تضيف شبكة أنت متصل فيها وتعرف رقمها السري لكنها مو موجودة في التطبيق وبكذا تساعد غيرك يلقى الشبكة ويتصل فيها.

التطبيق سهل جدًا, ماحبيت واجهه البرنامج كأنها قديمة شوي تشبه التطبيقات في IOS6, بس فكرة البرنامج تشفع له كثيير, التطبيق في نسخة مجانية ومدفوعة, ميزة النسخة المدفوعة أنها تعطيك أحقيه للحصول على الأرقام السرية للشبكات البعيدة عنك, فهنا أشوف إنها مفيدة إلا في حاله ماعندك مانع تستخدم 3/4G جهازك لوقت بسيط لين ماتحصل شبكة تتصل معاها. التطبيق يحتاج إلى إتصال بالإنترنت.

موجود هنا رابط التحميل لمستخدمي IOS ومستخدمي Android.

التطبيق له بديل اسمه WiFi Finder

يشبة فكرة التطبيق الأول, لكن ما أشوفه مستخدم فعليا عندنا, فما راح تلقى شبكات كثير, بس فيه أجانب كثير يتكلمون عنه فممكن يكون هو مستخدم عندهم أكثر من الأول.

تقدر تحمل التطبيق هذا من هنا لمستخدمي IOS ومستخدمي Android.


8- Foursquare

تطبيق يدلك على المطاعم, المقاهي, الأماكن الترفيهية الموجودة حولك ويوريك آراء الناس عليها وتقييمهم ومستوى الأسعار والخدمة وغيرها كثير, التطبيق مفيد جدًا كنت مسافر أو لا خاصة لو كنت من الناس اللي تحب تجرب الأشياء الجديدة, أو تحب تكون أول الناس اللي تعرف بالأماكن الجديدة! والمميز فيه لما تدخل مدينة جديدة راح يطلع لك تنبية يرحب فيك ويعلمك عن أشهر الأماكن في هذي المدينة. راح يعطيك التطبيق خيارات تختار منها المفضل عندك مثلا من نوع الأكل لنوع الخدمات وبعد ماتحدد راح تطلع لك الأماكن المناسبة لك أو اللي تطابق المواصفات اللي إخترتها.

التطبيق مجاني ومن أفضل التطبيقات عندي من تصميم واجهات للمهام اللي يسويها لسهولة إستخدامه, يحتاج إلى إتصال بالإنترنت, موجود هنا رابط التحميل لمستخدمي IOS ومستخدمي Android.

في تطبيق ثاني معاه اسمه Swarm

 مرتبط بالفورسكوير بس منفصل عنه بنفس الوقت, فكرته أنك لما تروح مكان تروح تسوي تشيك إن في المكان وتعطي رأيك بالمكان أو تحط صورة وأصدقائك يتابعونك ويتعرفون على رأيك, أو تقدر مثلا تقول خطتك لليوم للأماكن اللي بتروح لها عشان لو فيه أحد بيشاركك ويروح معاك! مرتبط بالفورسكوير بإنه لما تروح مكان وتسوي تشيك إن راح يطلب الفورسكوير تقييمك له وهذا راح يساعد المكان يتطور أو يغير من الشيء اللي ما أعجبك أو يستمر بنجاحه ويساعد الناس غيرك لما تعرف رأي الأغلبية بالمكان.

تقدر تحمل التطبيق من هنا لمستخدمي IOS ومستخدمي Android.

تقدر تستخدم أي من التطبيقين بدون الثاني لإن إرتباطهم بسيط ومايأثر بتشغيله.


وبكذا أكون ذكرت أكثر التطبيقات المستخدمة في السفر ومفيدة بشكل كبير.

لو كان عندك تطبيق مهم وماذكرته, أو تطبيق بديل أفضل من اللي ذكرتهم أذكره في التعليقات عشان كلنا نستفيد!

أشوفكم على خير.

Not sponsored.

Advertisements

3 أفكار على ”تطبيقات للسفر || Traveling Apps

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s